घरविहिन दर्जीलाई स्याङ्जाका स्थानीय यूवाद्वारा पक्कि घर उपहार
अन्य देश समाज स्थानीय![घरविहिन दर्जीलाई स्याङ्जाका स्थानीय यूवाद्वारा पक्कि घर उपहार](http://fishtailnews.com/wp-content/uploads/2021/12/IMG_7934.jpg)
१६ भदौ, स्याङ्जा । स्याङ्जा विरुवाका यूवाहरुले स्थानीय दर्जीलाई उपहार स्वरुप घर निर्माण गरिदिएका छन् । स्याङ्जाको विरुवा गाउँपालिका वडा न ७ स्थित माथिल्लो बलेउ र यादी गाउँका यूवाहरुले स्थानीय दर्जी ईमान सिँ नेपालीलाई रकम संकलन गरि पक्कि घर निर्माण गरिदिएका हुन् ।
![](http://fishtailnews.com/wp-content/uploads/2021/12/IMG_7934-1024x621.jpg)
नेपालीले विगत ४० वर्षयता दर्जी र कटुवालको रुपमा निरन्तर सेवा दिँदै आएका छन् । उनले परम्परागत बालिघरे प्रथाको आधारमा स्थानीयबाट मकै, कोदोजस्ता कृषि उपज पारिश्रमिक बापत बुझ्दै आएका छन् । उनलाई स्थानीयले ४० वर्षअघि दर्जी र कटुवालको रुपमा स्थानीयको सेवा गर्न छिमेकी गाउँबाट माथिल्लो बलेउ गाउँमा ल्याएका थिए । तर उनले आर्थिक अभावका कारण हालसम्म घर निर्माण गर्न सकेका थिएनन् ।
दर्जीको दुरावस्थालाई मध्यनजर गर्दै सोहि स्थानमा क्रियाशील सम्झना यूवा क्लवले ईमान सिँ नेपाली घर निर्माण अभियान सुरु गरेको थियो । "क्लवले स्वदेश तथा विदेशमा भएका स्थानीयहरुबाट घर निर्माणको लागि रकम संकलन गरेको हो" क्लवका अध्यक्ष गंगा गुरुङले बताए -"उनको बस्नको लागि आफ्नै घर थिएन । शरण लिएर बसिरहेको घर पनि जीर्ण अवस्थामा पुगेकाले हामीले उनलाई रकम जुटाएर घर बनाईदिने निर्णय गरेका हौँ ।"
![](http://fishtailnews.com/wp-content/uploads/2021/12/IMG_0520-1024x576.jpg)
चार दशक यता गाउँलेको सेवामा निरन्तर लागिरहेका नेपाली परिवारको सम्मानको लागि उपहार स्वरुप पक्कि घर निर्माण गरिएको अभियानका संयोजक पिम गुरुङको कथन छ । उनि अघि थप्छन्, "चार दशकदेखि गाउँलेको सेवा गर्दै आएका एउटा सच्चा सेवकको लागि यो एउटा नगन्य पुरस्कार मात्रै हो । तर यसले उनको परिवारको दैनिकीलाई सहज बनाउनेमा हामी विश्वस्त छौँ ।"
![](http://fishtailnews.com/wp-content/uploads/2021/12/Iman-jestha-1024x703.jpg)
नयाँ घर पाएपछि नेपाली परिवारले पनि खुशी व्यक्त गरेका छन् । "मैले आफ्नै बलमा घर बनाउने प्रयास नगरेको होईन । तर पैसा नभएकै कारणले बनाउन सकिनँ" ईमान सिँ नेपाली भन्छन्, "तर मलाई यो गाउँका दाजुभाईहरुले घर बनाईदिएर ठूलो गुन लगाउनुभएको छ । म साह्रै खुशी छु ।"
![](http://fishtailnews.com/wp-content/uploads/2021/12/Iman-1-1024x768.jpg)
नेपालीको घर निर्माणको लागि क्लवले साढे तिन लाख रुपैयाँ संकलन गरेको थियो । संकलित रकमले मात्रै घर बन्न सम्भव नहुने भएपछि क्लवका सदस्यहरुले निर्माण अवधिभर स्वतस्फुर्त रुपमा श्रमदान गरेका थिए । "यो काम सानै भएपनि हाम्रा लागि निकै महत्वपूर्ण र गर्व गर्न लायक काम हो" क्लवका उपाध्यक्ष टेक गुरुङको जिकिर छ- "यो एउटा उदाहरणीय काम हो, जसबाट अरुलाई पनि यसक किसिमको सामाजिक काम गर्न उत्प्रेरणा मिल्छ ।"
![](http://fishtailnews.com/wp-content/uploads/2021/12/Iman-3-1024x768.jpg)
![](http://fishtailnews.com/wp-content/uploads/2021/12/Iman-2-1024x768.jpg)