बोम्जन गुरुङ

१८ भदौ, सउल । दक्षिण कोरियामा रोगले थलिएका स्याङ्जाका आशिष थापालाई आर्थिक सहयोग प्राप्त भएको छ । दक्षिण कोरियामै कार्यरत स्याङ्जाका युवाहरु सम्मिलित कल्याणकारी संस्था स्याङ्जा परिवार दक्षिण कोरियाले बिरामी थापाको सहयोगार्थ आर्थिक संकलन अभियान सञ्चालन गरि संकलित रकम निजलाई हस्तान्तरण गरेको हो ।

सउल दोङ्देमुनस्थित स्याङ्जा घरमा रहेका उनलाई स्याङ्जा परिवारका केन्द्रीय अध्यक्ष युवराज गुरुङ, केन्द्रीय सल्लाहकारद्वय नरेन्द्र गुरुङ र होबिर दर्लामी मगर, संस्थाका भलिबल टीम क्याप्टेन अमित राना, सक्रिय व्यक्तित्व पुरन गुरुङ, बिरामी निकट व्यक्तित्व चमन थापा लगायतको उपस्थितिका विच सो सहयोग रकम हस्तान्तरण गरिएको हो । सोही अवसरका विच नेपाल मगर संघ दक्षिण कोरियाको प्रतिनिधित्व गर्दै सो संस्थाका प्रमुख सल्लाहकार रहेका होबिर दर्लामी मगरले रु. ७० हजार (७ लाख वोन) संस्थागत रुपमा प्रदान गरेका थिए । केहि हप्ता अघि मात्रै आपतकालिन राहतकोष स्थापनार्थ नेपालीका लागी नेपाली दक्षिण कोरियाद्वारा गत छुसकमा आयोजना गरिएको “सांगीतिक महाधमाका-२०१९ ” संकलित रकमबाट रु. एक लाख अर्थात दश लाख वोन सहयोग गरिसकिएको उक्त कार्यक्रमका संयोजक गुरुदत्त न्यौपानेले जानकारी दिए ।

उपचारार्थ आशीष थापा "सुर्य" सहयोग संकलन अभियानमा शीघ्र स्वास्थ्य लाभको कामना गर्दै आर्थिक सहयोग गर्नुहुने नेपाल मगर संघ दक्षिण कोरिया, सांगीतिक महाधमाका-२०१९ को टिम लगायत कोरियामा रहेका समस्त नेपाली दाजुभाई तथा दिदिबहिनीहरुलाई स्याङ्जा परिवार दक्षिण कोरियाले हार्दिक धन्यवाद व्यक्त गरेको छ ।