१२ भदौ, काठमाडौं । सज्जा चौलागाईं नेपाल आइडल सिजन ३ की विजेता घोषित भएकी छिन्। शुक्रवार भएको ग्रान्ड फिनालेमा प्रवीण बेडुवाल र किरणकुमार भुजेललाई पछि पार्दै सज्जा पहिलो महिला नेपाल आइडल बनेकी हुन्। मोरङकी सज्जा हाल काठमाडौंको गोकर्णेश्वर नगरपालिकामा बस्दै आइरहेकी छिन्। विजेता सज्जाले नगद ५० लाख रुपैयाँ पुरस्कार हात पारिन् । यस्तै फस्र्ट रनरअप बर्दियाका प्रवीण बेडवालले रु १५ लाख र सेकेण्ड रनरअप सिन्धुलीका किरण कुमार भुजेलले ५ लाख रुपैयाँ हात पारे । विद्यालयमाहुँदा देखि नै गायन प्रतियोगितामा सहभागि भइ प्रथम हुँदै आएकी सज्जा नेपाल आइडलमा प्रवेश गरेसँगै उनको रक पप शैली  बोल्ड आवाजको चर्चा हुन थालेको थियो। नेपाल आइडलमा सहभागी हुनु अघि सज्जाले काठमाडौंका विभिन्न लाउन्जहरुमा लाइभ सांगितिक प्रस्तुती दिने गर्थिन्। सज्जाले ‘दि लोडिङ’ नामक ब्यान्डमा समेत आबद्ध भएर काम गरेकी छिन्। हाल स्नातक गरिरहेकी सज्जाले संगीतमा भविष्य बनाउनुका साथै फेसन डिजाइर बन्ने सपना समेत बुनेकी छिन्।