एजेन्सी – इंग्ल्यान्डले पाकिस्तानविरुद्धको तीन टेस्ट सिरिज १-० ले जितेको छ । तेस्रो तथा अन्तिम टेष्ट बराबरीमा सकिएपछि घरेलु टोली इंग्ल्यान्डले पाकिस्तानविरुद्ध १० वर्षपछि टेस्ट सिरिज जितेको हो । इंग्ल्यान्डले सन् २०१० मा घरेलु मैदानमा पाकिस्तानलाई चार टेष्ट सिरिज ३–१ ले हराएको थियो । त्यसयता भने पाकिस्तानविरुद्ध टेस्ट सिरिज जित्न सकेको थिएन । वर्षाले प्रभावित हुँदा पाँचौ दिन अन्तिम सेसन मात्रै सम्भव भएको थियो । फलोअनमा परेको पाकिस्तानले दोस्रो इनिङमा ८३.१ ओभरमा ४ विकेट गुमाउँदै १ सय ८७ रन बनाएको अवस्थामा खेल बराबरीमा सकिएको थियो । पाकिस्तानका बाबर आजम ९१ बलमा ८ चौका सहित ६३ रनमा अविजित रहे । कप्तान अजहर अली १ सय १४ बलमा २ चौका सहित ३१ रनमा जो रुटबाट क्याच हुन पुगे । अजहरलाई आउट गर्दै जेम्स एन्डरसन टेस्टमा ६ सय विकेट लिने पहिलो तीव्र गतिका बलरको कीर्तिमान कायम गरेका थिए । ओपनर शान मसूदलाई स्टुअर्ट ब्रोडले १८ रनमा एलबिडब्लू आउट गरे । मसुदले ६६ बलमा २ चौका प्रहार गरे । अर्का ओपनर आबिद अलीलाई जेम्स एन्डरसनले ४२ रनमा एलबिडब्लू आउट गरे । आबिदले १ सय ६२ बलमा २ चौका प्रहार गरे । असाद सफिकलाई रुटले २१ रनमा एन्डरसनबाट क्याच आउट गराए । एन्डरसन २, रुट र ब्रोडले १-१ विकेट लिए । तेस्रो दिन पाकिस्तान पहिलो इनिङमा ९३ ओभरमा २ सय ७३ रनमा अल आउट हुँदै फलोअनमा परेको थियो । पाकिस्तानका कप्तान अजहर अली २ सय ७२ बलमा २१ चौका सहित १ सय ४१ रनमा अविजित रहेका थिए । मोहम्मद रिजवानले १ सय १३ बलमा ५ चौका र १ छक्का सहित ५३ रन जोडे । ओपनर शान मसूदलाई ४ रनमा जेम्स एन्डरसनले एलबिडब्लू आउट गरे । एन्डरसनलेनै आबिद अलीलाई १ रनमा डोम सिब्लेबाट क्याच गराए । बाबर आजमलाई एन्डरसनले ११ रनमा एलबिडब्लू आउट गर्दै इंग्ल्यान्डको पकड जमाएका थिए । असाद शफीकलाई एन्डरसनलेनै जो रुटबाट ५ रनमा क्याच आउट गराए । फवाद आलम पनि क्रिजमा लामो समय टिक्न सकेनन् । आलमलाई स्पिनर डोम बेसले २१ रनमा बटलरबाट क्याच गराएका थिए । यासिर शाह २०, शाहिन अफ्रिदी ३, मोहम्मद अब्बास एक र नसिम शाह शून्यमा आउट भए । एन्डरसनले ५ विकेट लिए । स्टुअर्ट ब्रोड २, क्रिस वोक्स र डोम बेसले १–१ विकेट लिए । त्यसअघि साउथह्याप्टनमा टस जितेर पहिला ब्याटिङ रोजेको इंग्ल्यान्डले १५४.४ ओभरमा ८ विकेटको क्षतिमा ५ सय ८३ रनमा पहिलो इनिङ समाप्तिको घोषणा गरेको थियो । इंग्ल्यान्डका युवा ब्याट्सम्यान ज्याक क्रलीले ३ सय ९३ बलमा ३४ चौका र १ छक्का सहित २ सय ६७ रनको उत्कृष्ट दोहोरो शतकीय इनिङ खेले । विकेटकिपर जस बटलरले ३ सय ११ बलमा १३ चौका र २ छक्का सहित १ सय ५२ रनको उत्कृष्ट शतकीय इनिङ खेले । पाँचौ विकेटका लागि बटलर र क्रलीले ३ सय ५९ रनको कीर्तिमानी साझेदारी गरेका थिए । क्रिस वोक्स ४०, स्टुअर्ट १५ रनमा आउट हुँदा डोम बेस २७ रनमा अविजित रहे । पाँचौ ओभरको तेस्रो बलमा शाहिन अफ्रिदीले रोरी बर्न्सलाई ६ रनमा शान मसूदबाट क्याच आउट गराए । अर्का ओपनर डोम सिब्लेलाई यासिर शाहले २२ रनमा एलबिडब्लू आउट गरे । कप्तान जो रुटलाई नसिम शाहले २९ रनमा विकेटकिपर मोहम्मद रिजवानको हातबाट क्याच गराए । पाकिस्तानका शाहिन अफ्रिदी, यासिर शाह र फवाद आलमले २–२ विकेट लिए । असाद सफीक र नसिम शाहले १–१ विकेट लिए । इंग्ल्यान्डका विकेटकिपर जस बटलर र पाकिस्तानका मोहम्मद रिजवान प्लेयर अफ द सिरिज चुनिए । पहिलो टेष्टमा इंग्ल्यान्ड तीन विकेटले विजयी हुँदा दोस्रो टेष्ट बराबरीमा सकिएको थियो । इंग्ल्यान्ड र पाकिस्तानबीच थप तीन टि२० सिरिज हुने छ । पहिलो खेल अगस्ट २८, दोस्रो ३० र अन्तिम सेप्टेम्बर १ मा हुने छ ।